اللي بسط بالسوق ما يجهل السوق=يعرف تّجاره ونوع البضاعه
ينشد عن أهل الشعر والفن والذوق=ومجالس العراف لو نصف ساعه
هي مكسب اللي رافعٍ هامته فوق=كل المراجل صايره له طماعه
وبالبحث والتدقيق جاء علم موثوق=عن مركبً بالبحر رافع شراعه
يغطس يبا الؤلؤ ولا هو بمسبوق=من دور الغالي يبي له براعه
قالوا جهز بين البشر صار مرموق=قلنا هلا يامرحبا بالجماعه
الرعد نسمع به وشفنا له بروق=به مزنةٍ صبت على كل قاعه
لو أن ما شفنا من الناس مخلوق=يوصف لنا سبع الجبل من سباعه
العلم جاك وجعل مايلحقك عوق=عسى التواصل ما يصير انقطاعه
مني سلام وبالوفاء دوم ملحوق=خذ الوداعه لاتضيع الوداعه

هب النسيم ورفرف القلب للشوق=والفكر حرك موجته والأذاعه
والعاصيات من الشوارد لفن روق=واستسلمن ليه بسمعٍ وطاعه
وفتحت عن زين الثمينات صندوق=نوادر العذبات ليه أولاعه
وخذت معهن هجعت الناس طاروق=في ساعتاً كلاً توسد ذراعه
وابحرت في بحر الشعر فوق زاروق=وعندي على موج البحور أستطاعه
ويالله يلي بالسماء معتلي فوق=بمرك هرج عيسى بادي رضاعه
انك توفقني على خير منطوق=وانك تجملني برد الوداعه
حي الكتاب اللي عطانيه مرزوق=فيه الكلام اللي يسر استماعه
من شاعراً ساق المعاني لنا سوق=يامرحبا بهل الفخر والشجاعه
ربعاً لنا في ظلهم ترتع النوق=واهل البيوت اللي وساعاً رباعه
ذيدانهم ترعى الخطر نبت زملوق=وعدوهم ما شاف منهم طماعه
قلته وانا من لابتن للعدو عوق=كم فارساً جابو جواده قلاعه
رجالنا حراً على روس شاهوق=ندر الحرار ولانحب الدناعه
يشهد لنا بالمجد غيهب وساحوق=ويشهد لنا التاريخ صدق وقاعه
وتمت وصلى الله على خير مخلوق=وجتك البضاعه يا كفيل البضاعه