منتديات البدارين - مع الشاعرة النايفة

هذه الأبيات لشاعرة رمزت لأسمها بالنايفة وقد كتبتها في إحدى المنتديات التي كنت أنا أحد المشاركين فيها ولكن لانشغالي وظروفي الخاصة انقطعت عن هذا المنتدى فقالت هذا القصيدة :

( النايفة ترجاك )

وينك يا ضيف الله عن الشعر غايب

نبي جديدك كان تسمع ندانا

النايفه ترجاك لو بالطلايب

نبي نشوف أشعارك بمنتدانا

ما باقي إلا أهل دمعي سكايـب

وانته ولا انته في الحقيقة معانا

إن كنت متكبر علينا وعايـب

حنا نقول الشعر مثلـك ترانـا

قولوا لضيف الله ترى البال طايب

بعد المودة ليـه راح وجفانـا

صحيح من قال الزمن ذا عجايب

اللي نعـزه صـار سبـة بلانـا

يابو وليد القلب من جد ذايب

مدري خطاكم كان ولا خطانا

النايفة جاتك تسوق الركايب

يا ضيف قلي وش يفيدك ضمانا

النايفة توصيك والقاف نايـب

توصيك يامن بالمحبه رمانـا

لا مت وهلوا فوق قبري ترايب

وصيتي يا ضيف تحضر عزانا

الشاعرة / النايفة

.................................................. ......

وهذا الرد /

يا النايفة ماني عن الشعر تايب

والقاف ما ظني بيومه عصانا

الشعر بقولة شباب (ن) وشايب

مادام عندي قلب وعندي لسانا

اكتب من بحور المعاني كتايب

واجيب من جزل القوافي سمانا

الصقر دايم يعتلي فالسحايب

فوق الجبال الشمخ يبني مكانا

يحلها لا جات حزت صعايب

لا جات فزعات الليالي حدانا

يا النايفة قولي صحيح ( ن ) وصايب

مابيع من هو بالمعزّة شرانا

والشعر ماهو عيب ولا هو غرايب

يا كثرهن بالشعر كانوا معانا

أشغالنا كانت تراها سبايب

والوقت لو نبغاه ما هو بهوانا

ومهما نغيب ونبتعد يا القرايب

ما يوم ننسى ما مضى من زمانا

ولو هبت رياح الهوى والهبايب

لابد ما يصفى ويرجع لقانا

شعر / ضيف الله البدراني (أبووليد)