باأزكى السلام بنفحة الهيل لا غاش=بدلال شيخٍ ينطح المقبليني
شيخٍ كريم يجود في كل ماحاش=فيه الصخاء ويكرم الغانميني
وفيه ضفه الجيعان يشبع ويعتاش=مايحسب اللي يبذله باليميني
من قلب صافي وأبيضٍ كنه الشاش=ينصى جمال فهيد راع الثميني
يعيش راع الطيب وأقول له عاش=الله يجيره من صدوف السنيني
أبا أمدحه وأشوش وأعدها كاش=وأقول وأقابل وعندي يقيني
خليفة عقيّل بعد مات هواش=شاعر ولا أبدع خيرة المبدعيني
حرٍ مطاليعه بعيده عن الطاش=ومضراب مخلابه يصيد السميني

يامرحبا مارفرف الجفن برماش=وماسلم المسلم على المسلميني
ومالاح براق الحيا وأرهش إرهاش=نوٍ غشينه سلوة الممحليني
بالشاعر اللي للتماثيل نقاش=ينقش على صم الصخور الثميني
سعد زبون الواجبه لا هبا اللاش=شغموم قرمٍ صيرميٍ وأميني
حرٍ على العليا مبادر وشواش=يشوش لا دنع خطاة الدويني
لاياسعد رؤوس الضبا مابها عراش=قبلي قالوه مدلهين الحزيني
ماعاد بالأشعار مايبهج الجاش=كلش خذوه جدودنا الأوليني
هذا الصحيح وكامي النور غشاش=غشاش لو قدمك يحلف اليميني
وشهادتك والله لشعري لها شاش=راسي وغرّد من صداها كنيني
أفخر بها فخر الفوارس بالأنماش=وأعتز فيها كل حينٍ وحيني