منتديات البدارين - يا دنــــيا من انـــــــتي له ؟؟؟

أراعي دواليـب الفَلـك والفَلـك دوّار
مثل من يراعي لايح البـرق ويخيلـه
ما غير ايتحرى للطراقـي وللخطّـار
قد اشتد فوق ابلـه وسفّـط معاميلـه
أوجّه عربسات الطواري على الأفكـار
لاجل تستهيض هجوس قلبي وتصفيله
على موجةٍ بالصدر كنها على الأقمـار
وأتابع على شاشـات قلبـي تماثيلـه
وأترجم نتايجها على لهجـة الشعّـار
وأصوغ البيوت وكـل بيـتٍ بتحليلـه
على شان تبقى طول عمري معي تذكار
قصيده ومطلعها (يادنيا من انتي لـه)
قصيدة غشيمٍ صار له في الزمان أدوار
تعلّم مـن دروس الزمـان وغرابيلـه
أشكّل تقاسيم الليالـي بـدون أوتـار
واغنّي طواريـق الزمـان ومواويلـه
زمان لا عز جدار عـوّد وهـد جـدار
والى زان ليله زاد سـوّه ميـة ليلـه
تقول أن من بيني وبينه من أول ثـار
على غير ماقلبي يبي مسـرجٍ خيلـه
تقويت فنجال العناء والهمـوم بهـار
يوم ان الهناء كـل تقهـوى فناجيلـه
وإلى جيت أدوّر للسعاده مع الأمـرار
لقيت السعـاده بيـن لفّـه وتحويلـه
أشوف الغبن طول الليالي وأنا صبّـار
وأقول احتمـال انّـه يغيّـر دواليلـه
زمان لا زاد إصرار زدنا عزم وإصرار
لو ان الزمن ماهو بيجهـل رجاجيلـه
لا صار الرجل عزم وروابع وفعل وكار
وكـفٍ تحـط بميلـة الوقـت تعديلـه
ما همّه ما جاه من الزمن زان والا بار
وماصعّبه وقتـه علـى الله تساهيلـه
لكنّ الزمن قام يحداني مثل مـا صـار
يالين الرشـا ماعـاد دارت محاحيلـه
زمان جعل بيني وبين الوليـف ستـار
ولافي يدي حيله ولافـي يـده حيلـه
صغيرٍ مكانه في الحشا ما عليه غبـار
خفوقي تحت حكمه وقلبـي مداهيلـه
أراعيه لو إنـه بعيـدٍ عـن الأنظـار
واحسّـب سنينـه واتحـرّاه وادعيلـه
ولَعته مثل طيـرٍ تولّـع بـه الصقّـار
يشيله علـى كفّـه ولاهـو بيمهيلـه
على أول هداده ما بعد فاخت الميكـار
لامنه اطلقه واستبعـده قـام يوميلـه
هويته زمان فات عاد الكبـار صغـار
قبل مايغصبونه هلـه يلبـس الشيلـه
عليه النظر من قبل يردون جيـل (...)
ياليته ماجاء في الارض لاهو ولاجيله
على شانه أخذ لفّتين علـى الفكسـار
أعرّض على بيته وقلبي وعينـي لـه
ولو كان أهله ما نعينه مـن المظهـار
لكن شوف بيته يجلـي الهـم ويزيلـه
حرامٍ لو إن ما هو بخيرة حمام الـدار
ماتطرحني سلوك الهوى في محابيلـه
الشاعر ؟ سعد بن مناحي بن شفلوت