منتديات البدارين - قصيده مرثيه بالفقيد بدر عاتق البدراني رحمه الله

الشاعر عبدالله جامع المطيري يرثي. رجل الاعمال بدر عاتق البدراني الحربي رحمه الله

قصيده مرثيه بالفقيد بدر عاتق البدراني رحمه الله

يا حرب عز الله فقدتم فقيده
مرحوم ياشيخ الوفاء والمهابه

افٍ على الدنيا أنا أشهد زهيده
كم فرقت خلان وأيضاً قرابه

أشهد شهادة حق إنه وليده
وعن ربعي المطران أعزي نيابه

فجايع الأيام ماهي جديده
كأس الحزن يا مر والله شرابه

ياطيب أبو عاتق وياجيد جيده
أسوأ خبر ياناس علم إنقلابه

كم واحدٍ قبله فجعكم شديده
عناد يا ابو عناد ينزف صوابه

الحي موته لاصقن في وريده
لا حان موته قدّر الله أسبابه

إدعوا لأبو عاتق دعاكم رصيده
إدعوا دعاكم محريٍ بالإجابة

عوّاد يشهد والخلايق شهيده
يحجّج اللي يحج ويوفي زهابه

ما ألوم نايف يوم يبكي عضيده
بإذن الولي عاتق يعوّض غيابه

ولا ألوم بادي والعلاقه وطيده
وحزنك يا أبو مخلد لحزنه مشابه

ذوي حباب رجال مبداء وعقيده
أهل الكرم وأهل الوفاء والرحابه

زحول الرجال أهل الفعول الفريده
الطيب ما شاء الله وفّوا نصابه

أمدح وأنا واثق ومدحي أعيده
حرب الحرايب من عصور الصحابه

حزن أقصرانا ماهدفنا نزيده
وفقيدهم الله يهوّن حسابه

مواقفي يا حرب معكم عديده
ولكم مواقف دوم ولابه غرابه

هذا ولد جامع وهذا قصيده
واجب على الشاعر يواسي أنسابه

وصلوا على راع الصفات الحميده
افضل بشر ماخاب رجل اقتدى به

عبدالله جامع المطيري