عرض مشاركة واحدة
قديم 28-10-2006, 10:54 AM   #3
افتراضي

بديت في نظم القصايد والأشعار = ولا نبني ألا طيبات المثايل
أبيات أرتّبها على ميز وأفكار = في حفل حرب اللي بها الرأس طايل
أهلاً وسهلا يا طويلين الأعمار = وأرحّب بفيصل سليل الحمايل
نهدي لأمير الدار ترحيبنا الحار = بأبيات شعرٍ محكماتٍ جزايل
يا مرحبا عداد همّال الأمطار = وأعداد ما لاحت بروق المخايل
حكامنا أهل العز والمجد والكار = قول تصدّقه الحجـج والفعايل
آل السعود ملوكنا عزوة الدار = صفوة ملوك الأرض من نسل وايل
مرحوم يا عودٍ عسى قبره أنوار = وحّد بإذن ربي شتات القبايل
عبد العزيز اللي به المدح يحتار = وشلون نوفي قدر وافي الخصايل
عبد العزيز اللي وطأ روس الأخطار = حتى رفع شعبه علو البتايل
عقّب ملوكٍ للوطن عز وأسوار = تحماه ما يغشاه حاسد وعايل
واليوم أبو متعب على نهجهم سار = عزمه شجيع ولا يهاب الهوايل
عز الصديق وللمعادين قهّار = هذاك أبو متعب كريم الشمايل
خيره على شعبه كما الغيث مدرار = دايم ومداته كبار وجزايل
وولي عهده فالمهمات ما أحتار = سلطان أبو خالد كريم النوايل
الله يعز الدار في ظل الأخيارأهل = الشرف والعز وأهل الفضايل
وفي جمع ربعي لي معزه وتذكار = وأفخر بربعي كاسبين الأوايل
حرب النشامى تكرم الضيف والجار = تنشر لها البيضا بروس الطوايل
دايم لهم وزعه ورفعة ومقدار = هم عزوتي هم كاسبين الجمايل
منها وفيها الطيب في طول الأشبار = ميراث من عهد الجدود الأوايل
أحرار والأحرار من نسل الأحرار = تاريخهم يعرف بليا دلايل
حماية الميقاف شبّابة النار = كسّابة الطالات والشك زايل
على العِدى دايم كما السيف بتّار = إن جاء نهارٍ فيه صايل وجايل
ربعي هل الطالة بعيدين الأنظار = أهل القنا ومولعين الفتايل
وتشريف جينا الحفل من دار لا دار = حفل الرجال الطيبين الأصايل
اللي بنو علمٍ على عز الأشوار = على النقا ما يعرفون المحايل
أبن دليم اللي بذل جهد جبّار = واللي فعل فعله رجالٍ قلايل
ومن شاركه نعمين في سر وجهار = قادوا مسير الحفل بتع وصمايل
وتحية التقدير وإجلال وإكبار = للي اجتهد فالحفل قول وفعايل
نبغى اللقاء ينعاد تكرار وامرار = وحرب تجمّع من جميع الفصايل
ومعمورنا يبنى على ساس وجدار = ولا ينهدم والهدم رأس الفشايل
نعلي بناه بحزم وبعزم وإصرار = ونتعب على عزّه بشتى الوسايل
ونورثه لأجيالنا صغار وكبار = والعلم هذا ما نبي له بدايل
وختامها صلّوا على خير مختار = شفيعنا يوم الحشر والهوايل

الشاعر / عطالله حمادي الغانمي الحربي







محمد بن جعيثن غير متواجد حالياً   رد مع اقتباس