ياأمير يا شين الخطأ منـك شينـاه
ياخوفتي عقلك هك اليـوم غايـب
يوم مثلك تزعل النـاس عوجـاه
رجّال عرف ومن حموله وشايـب
لاجا هل غي الجهل فيـه وأغـواه
ولا مسرد من كل الأطراف خايب
أنته تقـول القيـل وتجيـد معنـاه
شالك هوى نفسك على غير صايب
لا كان حنّا مـن تحـدى إنتحـداه
من دون واجبنا نجيـد الصوايـب
ياشايب غي الجهل تـوّ مـا جـاه
يبى يعيب النـاس والعـود عايـب
يا ضريغط اللي شال همن بدنيـاه
ياذيب بيـن معكرشـات الذوايـب
إن كان عنـدك للفعايـل إمجـازاه
حرب عمامك يوم مـسّ الجنايـب
غصب عليك وصامل العلم تلقـاه
ان طاب لك وإلا على غير طايـب
أبـوك معطينـا الأخـاوه بيمنـاه
لولا الأخـاوه راح مالـه نهايـب
يا مـن سواليفـه توسّـخ شفايـاه
ذيب العلوم ولا ذكر لـك حرايـب
طوبى مقرّ اللي ولى الحكم وأرساه
يامآ رسى واليوم حـدر النصايـب
ورّث حبيب الشعب عقبـه تـولاه
فيصل على كبد العدو سـمٍ ذايـب
بظلال أخو نوره مشى الذيب والشاه
خلّى الغنم والذيب تمشي صحايـب
وخلاّك يالنمرود تمشـي بحسنـاه
وتحط بالشعب السعودي عصايـب
والله يلو يدري عن العلم وأقصـاه
مالك شفاعه لـو تشفّعـت تايـب
مغترّ فيك الله علـى الخيـر يقـداه
وش عرّفه لك عند مطلق حلايـب
ماشاف نزل لك يـدق الخونـداه
بمعيلـه مثـل الخجـز واللعايـب
نزل نشوفـه والمخاليـق تدهـاه
نزل البـلاوي كلهـا والمصايـب
عن روس خلق الله وأنا أبـراي لله
عن ناس ترعى في طرفكم حبايـب
لو فيك خير ووجهك الشّين ينكـاه
مـا تعتـرض لمكمّليـن النوايـب
وأولاد وايل عن سوالفـك مغنـاه
ماهـم بعـوزك يامـدوّه زرايـب
قطعانهم عشب الخطر غصب ترعاه
ترعاه أباعرهم لـو الـدم رايـب
وحرب قواطيع على الخيل وإرماه
عوق الخصيم مورّدة كـل هايـب
وشريدة الفرسـان وشلـون تنسـاه
وشلون تنسى يا طويـل الخبايـب
اللي على شيل الجماهـي مضـرّاه
يمناه والفسقـان سيـف العطايـب
وإبن نحيت اللـي نهـار المثـاراه
كم كبد حـي شـب فيهـا لهايـب
على أبلج خلّـى الظـواري تعشّـاه
وبطوع إخو نوره تعشّـى كتايـب
وإبن جزاء يوم النضا جاه ينخـاه
وشلون تنسـى يالعيـن الصلايـب
يوم يشيب الراس من حس طريـاه
بيـن الحناكيـه وذيـك الجذايـب
وفيحان إخو نوره تحت حد شلفـاه
كم فارس خلاّ عظامـه حطايـب
اللي بجاهه يوم زاروا هـل الجـاه
رد الذويبي مـال رايـح كسايـب
ماخوذ غصب وضمّر الخيل تشعاه
وشلون تنسى ياعجيـب العجايـب
ونسيت إبن ناحل مع الضيف وقراه
هيف السّمين اللي بها النّي سايـب
اللي يدسّم شارب الضيـف لاجـاه
الخيل يعطيها وعطا البـل وهايـب
ونسيت منور ذيب جمـع سرايـاه
مثل الدّبا الكتفان ريـف القرايـب
حرز الذليل اللـي يفـك المخـلاّه
نسيت إخو حسنا عطيب الضّرايـب
وذويخ بالعربـان تكثـر رزايـاه
إليا شان نطق إمّيْليـن العصايـب
كم هيّة زيزومهـا جـاب حسنـاه
وسعود من بعـده يفـك النّشايـب
وإبن جديع اللـي بهيّـه ضحايـاه
فرسان قوم فـوق قـبٍ ربايـب
يبـون وضـحٍ بالأباهـر محنّـاه
افتكهـا ووّهـل جبرهـم نكايـب
ونسيت مانع حوض موت منايـاه
ماتأخـذ إلا محتميـن الدّبايـبـب
كم فارس قرّب له أجلـه وغفّـاه
وعليـه خـلاّ للحوايـم لـوايـب
من كف إخو فـزه نواعيـه تنعـاه
عليـه هـلاّت العبايـر سكايـب
ونويشي اللي بالخوي كل أوحـاه
بثرأ خويّـه عـن عوانيـه نايـب
قص أربعه وإثنين والسّابع أنجـاه
أنهى الملام وخاطره ماهو طايـب
وأبوك يالهيباد مـن فـك بحمـاه
يوم الرصاص بنوع وبل السحايب
برّم عصب رجليه وإنّـا احتمينـاه
دونه فعلنـا معجـزات غرايـب
واليوم عندك لـه محبـه وملجـاه
غوّال إبوك وحايب بـك حوايـب
والا ما تنسى وطيت فوق علبـاه
وميقافنا لا دفلجـن بـك ركايـب
جينـاه وإربـاع المبانـي ممّـلاه
في كل بيـت مكتّفيـن قضايـب
واللي نزل عنـده ثلاثيـن جمهـاه
بين الذرا والنار ضـم الحضايـب
من عرض من ربص هكاليوم بدماه
راع النقا والفوز يـوم الغصايـب
راسه سبق كفه على عرش ماطـاه
من كف إخو جوزاء وأبوك السّبايب
فعل على وضح النقاء ما إخترعناه
ما هي سواليف الوجيـه القلايـب
وأضحى جزاء ميقافنا اللي وقفنـاه
شبّهتنا ضيـن رثـع فيـه لايـب
ذيب يرد من أول الضّيـن لتـلاه
الشّكـوى لله ياكبيـر القطـايـب
والله والله واحـدٍ مــا أتمـهـزاه
بالكـذب..والله يالقلـوب اللبايـب
لولا القمر وسهيل والجـدي لـولاه
لأقول قول مـا تعقبـه طلايبـب
مار بذرا العنبـر تركـت العلنْـداه
ياللي تبي بالكـذب تأخـذ غلايـب
يالطّايش اللي طيّشه كبـر مركـاه
هلا هلا ياحوش بيـض التّرايـب
هذا جداك وغيـب قلبـك عرفنـاه
مار الغلط مرجوع وإنس الحزايـب
إما تعـذر عـن مقالـك ومنشـاه
عبر الأثير ولا نبي لـك نجايـب
يـوم المجلّـد كـل حـيٍّ تمـلاّه
تراك ما أنت من الإذاعـه نعايـب
دفترك ما خصيت به يـوم نقـراه
قاريـه أنـا ومسطّراتـه عرايـب
حتى تعذر لـك لنـاس مسمّـاه
كرّ النّظر وإحسب جميع الحسايـب
كرّ النظر وإضرب على ماتـورّاه
وعندك طريق العافيـه والعقايـب
إمّا حفرت البير وإقطن علـى مـاه
وإلا تدمّـه دام مـيّـه سـرايـب
مادام كـل ماسـك مـاه بلـزاه
وإلا تعرّضت المحـن والصّعايـب
يمّـك ملاييـن المدافـع معـبّـاه
وأقفالـهـا قيّـادهـا بالكـرايـب
الطّيش لايحرمـك لـذ المسـاواه
إعرف ترى للطيش غيب وغبايـب
إلا إن عندك للخزى ميـل مشهـاه
معجبك مالك من فعولـن رهايـب
فالله خلق للداء دواء وأنت مـن داه
ودواك للجـرّاح فيـه الطـرايـب
ياما لعينـك مـن مغثّـه ومـاذاه
ياللي بحركم يامليـن الـذ هايـب
به حصة بيضاء تـلالا مغطّـاه
غيّم سماها بين خضـر رطايـب
ماأدري ركبها غبار شيول ومسحاه
وإلا بهـا زدتـم إعـداد الجلايـب
لاوا قفيـن ولا بالأعيـان شفنـاه
حظـي بـري لله علينـا رقايـب
حظي بري ما قالوا النـاس قلنـاه
وبحظ من جاب الخبر لـي جايـب
ياطير إبن برمان مـدري حلايـاه
ياللي تبـي فينـا تحـط النّقايـب
ماهو هلا يالمنتسب عقـب عفنـاه
حنّا جبرنا مـا يحـوش القشايـب
ولا عندنـا لـك يامحمـد مناجـاه
خبل تومِّي فـي شنبـك الهبايـب
تبي تمثِّل عنتـر الخيـل جهجـاه
تمثيل وإلا مسـرد ماأنـت ثايـب