السلام عليكم و رحكة الله وبركانه
.
.
وجه الاخ تركي الشدادي هذه القصيده
.
يالشاعر المبدع لك أبياتي أسوق=حيثٍ مثلك يفهم الشعر لاساق
يامحمد أنا ضعت في حب مخلوق= ربي عطاه من الحلا كل مالاق
من أخمس أقدامه إلى الراس من فوق = ماهو جليل وهو نحيّّّف دقاق
ذوقٍ(ن) على ذوق(ن) وذوق(ن)على ذوق=جامع جميع جموع جملات الأذواق
له هرجةٍ تدخل على القلب برفوق=بلسم شفاء يطغى على كل الأعماق
وله مبسمٍ ياخذك لاقصى مدى التوق=وله شفةٍ تروي عطش جف الأرياق
له طلة أبهاء من أملاك فاروق=اللي لوت بالشرق عدلات الأعناق
متناغم الخطوات ماهو بمطفوق=مشيه تقل يمشي على عزف دقاق
اليا نطحته ينطحك نور وشروق=ولياقفيته أدهم الليل منساق
سبحان ربٍ حط في خلقه فروق=سبحان من سواه سبحان خلاق
أشتاق له لو هو سكن داخل الموق=دايم وأنا لمعذب القلب مشتاق
علمي وحلمي والوله عند معشوق=صارن رهينات وسط كف الأشواق
عشقه سرى مابين شريان وعروق=عشقه كما دمي مع العرق ينساق
هو كل تركي وآخذ الطاق مطبوق=هو كل دنيايه مواصيل وفراق
من العناء والشعر والحب والذوق=كتبت لك ياصاحبي كل مالاق
كتبت آخر سطر في سر معشوق= القصه اللي سطرت حب عشاق
.
.
وهاذا ردي عليه
بعداد تـال الليـل مالاحـت بـروق = وألذ من طعم العسـل يـوم ينـذاق
ولا درير اللي رعت نبـت زملـوق = وضحآ بكر هي شف راعين الاذواق
في مرتعآ ماطبـه الا هـل النـوق = وشهب الجيوب اللي تباري لها نياق
وضحآ مفاليهـا بشعبـان ساحـوق = الديره اللي حبهـا وسـط الاعمـاق
حييت ياللي من هوا الترف مزنـوق = يانادرآ ماكرك فـي راس شوهـاق
يمناك ماهي يابن الاحـرار للعـوق= يالمغرم الهايم بموجـات الاشـواق
قبلك ترى قلبي من الخشف مسروق= طردتهن حتى شكى القلب الارهـاق
ذكرتنا باللـي لهـا هزنـا الشـوق = شوق الضوامي لالمحوا ضوح براق
مكحولة العينيـن والعنـق منتـوق = ملهوفة السرجوف مبرومة السـاق
اللي طراخمها تقل ريـش غرنـوق = شقرا الجديل اللي على الردف منساق
راعي نهودن منهن الجيـب مفتـوق = اللون لون الثلج والملمـس رقـاق
والعين عين اللي بدى راس شاهوق = حرآ وحش للجول ساطـي ولحـاق
من اللبس بعض اطرافها تقل مخنوق = واسع ولكنه علـى اردافهـا ضـاق
غيدآ لها بالمجتمـع قـدر مرمـوق = ومن دونها سيفآ يقص اقسى الاعناق
ماتغازل العشاق في ساحة السـوق = فيها الحيا ممزوج مع غنج واخـلاق
من عقبها كني على الوجه مصفوق = اثر الغـلا ياخـوك ماهـو بينطـاق
اقفت ضمى ونا على شوفهـا اتـوق = وانشهـد ان الحـب للحـال سـراق
ريمآ غلاها طوق القلب فـي طـوق = تطويق ساق الحر الاشقر بمسبـاق
لعيونهـا ياكثـر ماجـر طــاروق = وياكثر ماارخيت القلم فـوق الاوراق
حصل الفراق ولا انطفت جمرة الشوق = الله يسهل دربهـا بحسـن الاوفـاق
إن كان خلك دونه إمقاضـب حلـوق = الوقت ماهـو وقـت بنـدق وتفـاق
ماهي رخامه ميـر للعالـم احقـوق = والكـل منـا لـه مـع الله ميثـاق
الروح من دونك ترى نسوقها سوق = لوهي بوقت اللي لها ريش وحـلاق
الخيل تسرج وأبلج السيـف مذلـوق = وإلك انتعزوى بيوم نشفات الاريـاق
وكان إنه بجاه الرياجيـل (ملحـوق) = والمـال لوهـو بالملاييـن ينسـاق
وعداد مابروس النخل مالت اعـذوق = اقبـل سلامـي عـد ماهـل دفـاق
وكم واحدآ من لوعة الحب مرهـوق = بدنيـآ عوايدهـا تجمـاع وفـراق