يا فهد ما ترد لاجاك اتصال
والعرب من فعلتك متحيّرة
يوم ضاق الصدر دورت الجزال
أعسف اللي جافلة ومذيّرة
القصايد نوب تبنى من خيال
ونوب من ضيقة تجيك مطيّرة
بختصرها دامها جتني عدال
ما با طوّلها وهي قصيّرة
كيف زاد الصد والتطنيش طال
والاوادم فالزمان مسيّرة
ذاخرك وقت اللوازم راس مال
من رجالٍ فالتعامل خيّرة
كان ما تقدر على شيل الثقال
أرسل المعذار يمي سيّره
الوعد يبقى عهد وبلا جدال
دام تفهمه العقول النيّرة
ما حسبنا للدراهم والريال
ولا حدٍ منا الفلوس تغيّره
وكان ابو زيد الهلالي له مجال
ما يشيل الحمل غير بعيّره
ون ذكرت أنك رفيق وراس مال
أعتبر دعواي ذي صغيّرة
شعر : فهد نفيع البدراني