لقيت صداتي عن الناس راحه
..............لاصار مالي عندهم يا ولد كار
ناسٍ تشيل الكره بغض ووقاحه
..............ابشر بضحك وقلبٍ أسود من القار
ترى رفيقن ما يحب الصراحه
.............ما هو رفيقن لك ولو صار ما صار
ابعد مراحك لا يقرب مراحه
.................ناسٍ بدل ناسٍ ودارٍ بدل دار
ممشاك في جوٍ فسيح براحه
...........اخير من ممشاك مع ميت النار
وافطن ترى الدنيا شديدٍ وراحه
..........يوم معك واليوم الآخر مع الجار
واعلم ترى عز الفتى في صلاحه
............حجٍ وصوم وركعتينٍ بالاسحار
راشد بن فهد الدوسري