أو وليد - أبو ناصر
الليله الليله مادون اثنين يا القلب اللبيب= ماينفع المعذار لو جابوه وقت المعذره أن غاب ضيف الله عسى ابو ناصر مايغيب = على شان الجمال اللي نشوف محدره |
الليله الليله رميت النفس في ناراللهيب = محد يتعذر وانا عفونا العفو عند المقدره
بعد حضرنا الملعبة احذر عن اللازم تهيب = البني يبغاله عزاز اصحى عليّ تكسره |
صحة ألسنتكما ، ونا خلوني متابع لكم ون بغيتم فزعه تلقوني مع الصفوف ، المهم نبي نستمتع معكم ونمتع الحضور ، وعساكم على القوه |
أقول يا اخوان الصفوف تعبوا وهم يرددون وراكم واصلوا اللعب سريع سريع ترى طول الإنتظار يصرف الأنظار |
اسف عن التاخر والرد جاي انا منزل الطاروق الليلة الخميس وجاء ظهر الخميس ما احد رد وتخبرون خميس وطلعات وتو انا جاي وتراي مامن امور كلامي اكثر من فعلي مير رفقوا علي
|
مسكت خطام المطية مير مدري وش تجيب = أرد على عد الروى قطعان حرب مصدره انته تزعمت الجموع اللي لها فعلاً يصيب = يوم الديار مربعه وراك يوم تطيره |
أنا يادوب ماسك نفسي شوي وأدخل عرض لكن ابو ناصر يكفي ، واللي يتعب فيكم يعلمني بس يشرلي بالمنديل ويقول أنا ماشي ولا زلنا متابعين وحياكم ،، |
يا ابو ليد لاتطلع من الصف حسن لك لاوالله اترك ابو ناصر وعود عليك
|
أقول إذا ما لقيتني مع الصفوف تلقاني عند الطباخين ههههههههههه |
يا الربع من شاف ابو ناصر هل وهو من اليوم يصخن والا ويينه يا الله عسى المانع خير
ابو وليد مسكناه وعاد يقدر يروح |
اليا مسكت خطامها اورد بها على القليب = ترى الحرير اليوم عند ه علم ويحين قدره ويش انت شايف يا خوي الذيب قدمك رجل ذيب = ان كان عززت البناء انا ترى ماغيره |
اقتباس:
هلا بك يالحرير وين الغيبه البارح انا بالمدينة ويوم جيت ورديت عليك وليا غير الصفوف وبعدها رحت بعد لحفل وتوي جيت وابشر بسعدك دمت بود |
اقتباس:
ابو وليد لا تروح امسك الصف وناد معك الجماعة انا قريب والحرير ما هو بعيد هههههههههه لك تحيتي |
اقتباس:
هلا بك ابو وليد وابشر بسعدك اوالملعبة بدون صفوف ويش يبغبها لك تحيتي وتقديري |
والله مادريت عن الملعبة غير الحين ، لكن المرات الجايه يا ليت يكون فيه تنظيم قبلها بوقت كافي بالذات في مثل هذه الأيام ، الكل مشغول في المناسبات ، وابشركم الصفوف شادين حيلهم وفيهم كم واحد مغمى عليه من شدة الحماس ، لكن الإحتياط موجودين ،وتمت عملية الاستبدال واوقد النار يا شبابها ، معكم للصبح ،، |
ظنيت ظن خير فيكم مار جعله مايخيب = بنشدك عن بير الروى وراها يوم مقطره لي مقصداً لساع ماجوبتني وانا الطليب = ماودي اوضح كثير وانت راع المقدره |
انتبهوا ترى تكرار القافية ممنوع ، لا أحد يقول ما انتبهت على طول كرت أحمر من الملعبة |
خلووووها .. خلووووها انته على ظنك وخذ قاف كما در الحليب = بير الروى فيها الروى لكن ماتقوى خطره على الخطاء ما احدٍ يحدك وانتبه لي يا الحبيب = وانا عرفت العلم كلّه وانت ماجبت خبره |
أنته تعرف العلم من اليوم قاعد بالشعيب = ماهي رخامه فيك مير عيت تجيك مصطره على الخطا ماني سبوق ولا تشين بالقريب = عينك كبيره مار مدري ليش تروح صغيره |
الختام عندك يا ابو ناصر اذا حبيت
|
أقول عاد أنت وياه الركب ممنوعة وشد الشعر واللكمات المباشرة للوجه والضرب تحت الحزام كل ذا ممنوع نبغى مضاربة بس في منتهى الأدب والأخلاق !! والميدان يا حميدان وحنا معكم مستمتعين ، لكن تراكم غبرتوا علينا !! |
أن جت كذا والا كذا ما أظن لك فيها نصيب = الرأس مليانه سطر والحبر وسط المحبره
الشين ما هو دل لي والطيبة تجزى بطيب = وانته يالو اذانك كبار المنادي تزجره |
[quote=الحرير;41339]الختام عندك يا ابو ناصر اذا حبيت[/quot
يعطيك العافية اخوي الحرير سعدت بهذه المحاورة والسموحة لك فائق احترامي وتقديري |
يعطيكم العافية وبيض الله وجيهكم ما قصرتم لكم تحياتي وجميع الاخوة الحضور |
اقتباس:
ابو وليد عاد انت من الليلة وانت تحارش بيننا ختمناها قدام نتلازم الشوش ههههههه وبيض الله وجيهكم صفوفنا ما قصرتم وتريونا تحيتي وتقديري |
اقتباس:
المحاورة حلاوتها في نهايتها والعاده الصفوف هم اللي يشبونها وحنا ماقصرنا معكم لكن المره الجايه ودي انها تكون محاورة رباعية على طريقة المصارعة الحرة والفوز فيها اما باستسلام الخصم أو التثبيت ، اما لجوء الخصم للحبال غير مقبول نهائي وحزام البطولة للحين باقي في محله عند اللجنة المنظمة للبطولة أخوكم ومحبكم / أبووليد ،، |
اشكر الشاعر الكبير الذي تشرفت في مجارته عبدالمطلوب مبارك البداراني والذي منه نستفيد وعذرني اذا كان فيه تجاوزات وهي كلها تصب في صالح الحماس للمحاورة وشكر موصول للشاعر الكبير ضيف الله مناور البدراني الذي له دور كبير وله مني جزيل الشكر كما اشكر جميع من تابعنا ودمتم بخير وعافية ... بعيداً عن الاسماء المستعارة تقبلوا تحياتي اخوكم /
محمد بن عويض الحرير الفرسني البدراني العمري المسروحي الحربي |
اقتباس:
هلا بك يا ابن العم وما حصل قصور وعلى كل تشرفنا بمعرفتك يا محمد وبيض الله وجهك لك فائق التحية والتقدير |
اقتباس:
اقتباس:
حياك الله يا بو عويض وانت شاعر راقي لك اسلوبك الخاص فيك وزياده على ذلك أخلاقك العالية التي بها كسبت محبة اخوانك أعضاء هذا المنتدى والآن بعد ما افصحت عن اسمك الحقيقي أنت ما طلعت من الجماعة وبس إلا طلعت من خوال الأبناء ، فحياك الله وبارك الله فيك ، وتحية خاصة لك من بدارين الحناكية كلهم ، ولا انسى اخوي القدير الشاعر العذب أبو ناصر سفيرنا في وادي الفرع له خالص الشكر والتقدير على كل ما يقوم به من جهد واضح ومميز لخدمة هذا المنتدى ، وأبو ناصر اللي مايعرفه يحبه واللي يعرفه يحبه أكثر والله سبحانه وتعالى إذا حب عبده حبب الناس فيه . أخوكم ومحبكم / أبووليد ،، |
اقتباس:
الاخ الغالي ابو وليد يعطيك العافية هذا الاطراء من طيب معدنك وكلنا اخوة وابناء عم ونتشرف بمعرفة ربعنا وابناء عمومتنا لك فائق شكري وتقديري |
اقتباس:
لك عند ربعك وغيرهم كل تقدير واحترام ، وتستاهل كل خير يابو ناصر . أخوك أبوليد ،، |
الساعة الآن 08:05 AM. |
Powered by vBulletin® Version 3.7.1
Copyright ©2000 - 2024, Jelsoft Enterprises Ltd.
mamnoa 4.0 by DAHOM