منتديات البدارين

بسم الله الرحمن الرحيم
هذه مساجله بيني وبين الشاعر طلال سعد البدراني

قم يانديبي فوق جيب ن ينشميك
جيب ن ليا كثرت روابعك نشماك
لاامسيت في ديره لديره يسريك
كم ليلة فيها ابيض اللون سراك
اخرموديل ليا عطى الخط يشفيك
من خف روحه مايلكلك ويفحاك
يفز من فزتك كنه مصا فيك
كنه يقول ابشر بعزك مايعصاك
فيكسار عن خافي مزاياه ينبيك
من ماتعدد فيه بذك و عناك
ليا وقف كنه يشدك ويغريك
وليا مشى كنه يقول اتحداك
بلفين ميلادي وعشره ورد شيك
ماشك بمديله وباالنوع شكاك
لولاه ياالمندوب انا ويش ابي فيك
لاكن دوك الخط يا صاحبي هاك
امش الصباح الله يجيرك ويحميك
قبل طلوع النور ياالقرم ممشاك
شغل قبل يا صاحبي يذن الديك
فك الزرار ودق سلفه بيمناك
وشد الحزام ومس فوقه علابيك
وذهن تدنق لاركبته بعلباك
انص الغروب وخل ظلك يباريك
ترى شروق الشمس لقفيت يقفاك
من الرياض امسك طريق ن يوديك
عليه لوحات المدينه تقديك
ادعس ورى الميتين لن كان يمديك
وثبت مثبت سرعته كان ممداك
ولاضاق بالك شغل اللي يسليك
حط الشريط اللي لياضقت سلاك
تراه صياف السحيمي لاوصيك
لاصار مع مطلق لهذ ولا ذاك
انس الهموم وخل شي ن معنيك
ووصل خطاب اللي يدزك ووصاك
والظهر وانته باالمدينه حراويك
عند الوجيه البيض يالقرم ملفاك
تلقا طلال اللي يفز ويحييك
قدام لاتقلط وقفلك وحياك
سلم عليه وقول انا جيت ناصيك
يابن الشجيع اللي على الطيب ضراك
قله تراني واصلك من بناخيك
عبدالله اللي باالمهمات ينصاك
عطه الجواب اللي على القافيه حيك
اللي على اليى صار والكاف والااك
ويعرف سبب مافكك القلب تفكيك
اللي دخل قلبي من اسبابه ارباك
حتى تركني من حساب المداريك
وادرك حياتي بالهوى والغلا ادراك
كنه يقول من الهوا ويش ينجيك
لادك في قلبي من الهم دكاك
ونا بلشت وطحت لي في شرابيك
يابن سعد شفلي طريقه ومسلاك
افزع لمن في سر قلبه يناجيك
ابذله المجهود واسعرع بجدواك

الشاعر
عبدالله منور البدراني

اما الشاعر طلال سعد رد علي يقول

البارحه مابين هذه وهاذيك
والجفن له عن لذة النوم دكاك
بين الدلال المحرقات الصعاليك
اللي تداوي مغرم الراس لاصاك
لافاح منها ريحة الهيل تشفيك
تشفيك لاونك على حبل الادراك
من بعدها زالت جميع الشرابيك
وزانت هواجيس المعنى للدبلك
يامرحبا باالخط والله يحييك
ياموصل المكتوب حياك حياك
هات الكتاب وبيض الله مساعيك
واخذ مرده ياالسنافي بيمناك
ساعة فتشته بينن لي معانيك
يابو زياد الزين حدك على اقصاك
والله مالومك لو تبيح بخافيك
كم ناس قبلك صابهم مثل ماجاك
خلنه الخفرات بين المداريك
والحب سيف ن للمناعير سفاك
وانته مشيت بدربهم في مماشيك
شي ن بوسط القلب مامنه فكاك
كان الحبيب اللي تحبه مصافيك
يزعل على شانك ويرضى على ارضاك
بالحب من سكر غرامه يساقيك
لاضميت عروق الغلا قام واسقاك
مبداه ماهو مختلف عن مباديك
يشبه بدرب الحب دربك ومبداك
عطني خبر عن دار خلك ومغليك
وابشر بما يشرح ضميرك بدنياك
ابشر بما يشرح ضميرك ويرضيك
ولاعاش منهو تعتزي به ويشناك
انكانها با الجاه حنا عزاويك
كم لحية ن تفزع لاجاها ملحاك
ماتختلف هقواتنا عن هقاويك
تلفي على اهل الزين ويزين ملفاك
وان كانه با المال تامر ونعطيك
في ذمتي في ذمتي ماتعداك
مايطلبونه ياابيض الوجه ياتيك
لوهو ورى المليون عده بمخباك
واقبل سلام ن سايقينه تواليك
من واحد ن يفرح ليا سمع طرياك

الشاعر
طلال سعد البدراني