يا الله يامنشي السحاب ألثقالي = تسقي بها دار نعزه ونغليه
أنت العليم وعالم بالحوالي = علام ما وسط الضمائر نخفيه
بديت قولي بعد جاله مجالي = ذكرى شجيع كلنا نفتخر فيه
عبد العزيز إن قلت يعجز مقالي = والله ما بالقول والوصف أوفيه
قرم شجاع رافع الرأس عالي = حفظ الأمن والدين غاية مراميه
جمع شتات القوم شرق وشمالي = بحزم وعلم وكل طمعان يثنيه
والى الجنوب أرسل شجيع ألعيالي = اللي شبات السيف بالدم يرويه
وعلى الحجاز أرسى كريم السبالي = حكمه وبعّد كل من طامع فيه
وبعده عيال يحتمون التوالي = حريبهم مقهور والرب مرديه
بعده سعود اللي بحكمه مثالي = حكمه على نهج الموحّد ممشييه
وبعده حكم فيصل عزيز وغالي = النادر اللي طيبات مباديه
عم الرخاء بجبالها والسهالي = وضد الحريب اللي تزايد تهقويه
وبعده حكم خالد وحكمه عدالي = عهده رخاء والكل بالخير يطريه
وفي حكم أبو فيصل شربنا ألزلالي = حكم الشريعة منهج له يقديه
طال البناء بالعلم والعزم طالي = وراع التجارة طيبات معانيه
وشق الطرق مع عاليات ألجبالي = وراع ألزراعه كل شيء يلاقيه
وحتى البحر يصل المخاليق حالي = شيء كبير والله لذا الخير معطيه
وموفقه ربي عزيز ألجلالي = للتوسعة ولخدمة البيت مهديه
وإعانة تعطى لراع ألحلالي = وفر له أعلاف تسم مواشيه
وعلم لمن هم يرغبون المعالي = في كل قربة والهجر مع بواديه
وامن وأمان وفي نعيم ظلالي = في ظل أبو فيصل عسى الرب يحميه
وعضيد قائدنا عريب الخوالي = عبد الله اللي كل شعبه يحييه
وسلطان مزبن من وطته الليالي = هو فزعة اللي ما لقي من يذريه
أل السعود مزبنة كل جالي = أسرة وفاء والشبل يطلع على أبيه
دخيلهم يطلع بروس العلالي = هم فزعة المظيوم هم ستر عانيه
يا الله يامنشي صدور الخيالي = تحفظ فهدن معطي الحق راعيه
وصلوا عدد ما قيل هل الهلالي = على نبي وجه الخلق توجيه