الله من قلب(ن) خطير(ن) يذوبي = توارده عوق الهواجيس بالزام
تواردنه من شمال وجنوبي = أكثر من اللي طوقوا قصر صدام
هانيكم يادالهين القلوبي = يالغافلين اللي مثل حمر الأنعام
وانا الليالي خانقتني بثوبي = واهد وابني بالتمني والأوهام
ماقلتها بمعطرات الجيوبي = ولاهي هزيمة خوف من ضد الأخصام
وانا احمد الله ماغدالي ذهوبي = حاميني الإسلام وسيوف الإسلام
رش المطر عنا نحاه الهبوبي = يبرق ولا يمطر علينا من العام
يالله عسى ماهي سبايب ذنوبي = او زلة(ن) زجت بها روس الأقلام
ياطيب السيرة تراك مغلوبي = جاك الزمان اللي مواليده اتوام
وقت (غدى) فيه الصدوق الكذوبي = ومطوع الحاره سرق خبز الايتام
الشاعر
(عقيل بن حمد السامود البدراني)