الله من ضيقةِ بالصدر مكتومه= والطب هو والأطباء مايداويها
أضيق من حاجة ماهي بمعلومه=يعلم بها خالق الدنيا ومن فيها
يالله يالي تعرف العبد وسلومه=تعلم بمكنون نفسه وأنت واليها
تفرج هموم وسط القلب ملمومه=يشيلها القلب لو ماهو بقاويها
الوقت يمشي بنا ليله ورا يومه=دنيا لها دور جعل الله يكافيها
أشوف بعض العرب بالوقت منجومه=تحط وتشيل لو ماحد بداعيها
واليا نصحته عليك يشيل قدومه=يقول هاذي عليه ماتسويها
واليا إعترض كبر ضلع طويق وحزومه=تبلش معه والقضيه وين قاضيها
وسط العرب ينتصب ويكبر علومه=ويقول أناكاتب الحجه وقاريها
بعض الرياجيل رجل بداخل هدومه=ويجيب بعض العلوم ولايوديها
النفس في رفقته ماهي إبملزومه=من دونها البعد يبريها ويشفيها
دار بدل دار والأرزاق مقسومه=ونفس الفتى رزقها في كف باريها
الشاعر الرائع / حمود بن حمد البدراني