[عبدالله مناور البدراني]

مكارم الأخلاق

الطيب لهل الطيب مثني ومربوع = أما الردي ماله من الطيب حاجه
أمقوّله ماهي من أيام واسبوع = سلم العرب واجب علينا انتهاجه
الناس فيها عدة أصناف وطبوع = فيها الأصيل وفيها ذاك الخماجه
اللي من أفعال الأجاويد مقطوع = حرام ما يسوى جناح الدجاجة
يا شين حاله والعقل منه منزوع = شتان بين العذب وبين الهماجه
لا يقدّر الجيرة ولا يعرف ربوع = ولا من تكلم كل حكيه عواجه
كل شي في حكمة محرم وممنوع = إلا الذي يقبل هواه ومزاجه
هذا سقيم الفكر ضايع وموجوع = والفكر يصعب للمداوي علاجه
والبعض فيه الخير للناس ينبوع = بفعل الكرم والجود وفلت حجاجه
يسوى عدد ماله من عظام وضلوع = اللي لا جوه الناس زاد ابتهاجه
نبت الوفا في داخله غرس مزروع = يثمر من خصال المكارم نتاجه
يا ليت مثله بالخلايق له فروع = ياليت درب الطيب واسع فجاجه
هذا هو اللي يا عرب حق مشروع = هذا الذي ودّه يزيد بنتاجه
حديث في السنة مقرر وموضوع = موجود عند الترمذي وابن ماجه
مكارم الأخلاق في الدين مطبوع = والعاقل اللي يجعل الدين تاجه
= شعر /ضيف الله البدراني (أبووليد)