بسم الله الرحمن الرحيم
هنا ديوان الشاعر العذ ب الرائع صنت عوض البدراني
امل ان يحوز على رضاكم واعجابكم ...
هذه مشاركه متواضعه وهديها الى فارس حرب/ عليان الطهيمي بمناسبة مشاركته بجائزة الملك عبدالعزيز ال سعود لمزاين الابل وامل ان توفي الغرض وسامحونا على القصور
يالجــنة التحيكــم لمزايــن الذود = جتكم مغاتيرٍ وسموا علاهن
كلٍ يســمي لاقـبل الذود بركــود = يذكر عزيز الملك عالم خفاهن
وإلا الحلى والزين والوصف موجود = من ربهن تكمل وصايف حلاهن
جتكم مغاتير الطهيمي على الزود = سبحان ربٍ بالوصايف عطاهن
لها مع المكسب مواثيق وعهود = هن نخبة النخبه ولابه سواهن
مايلحق الوحده من الوصف منقود = وصف المزاين بالكمال احتواهن
لاعرضن بالماد والذود محشود = تبهر عيون اللي نظر في حداهن
في وصفهن ماني على الزور محدود = كل الخلايق شاهدت في حلاهن
شرف الاذاني كنها حربة جنود = رثم الخشوم اللي عريضٍ عزاهن
سند الغوارب عنقها سيف مجرود = فجحٍ تهول العقل مشية اخطاهن
كن البرد ياخذ من الوانها طود = بيضٍ يحير شكلهن من صفاهن
مثل المزن لاساقته سبق النود = غطى على روس الجبال وكساهن
واللي قناها شيخ بالعرف معدود = يستاهل النوماس شبلٍ قناهن
من روس قومٍ سيفها دوم محدود = تسلم يمين اللي بجوده غذاهن
حربي على الوقفات والفعل مشهود = حاف المراجل والأوائل خذاهن
ياللي ملكتوا بيض وإلا بعد سود = صفوا ضغاينكم وسموا علاهن
0