ياراسي الصاحي حسب ماتوريت = خليتها مابين رامي اوحذاف
امــا تـفـجـر ورد والا دنامـيــت = والحمدلله ماعلى روحي خلاف
الطيبـه تلقـا لهـا بالحشــا بيــت = والمخطيه ينحط من دونها كتاف
من مــد لي فنجال كيفن تقهـويت = واعطيته المعسول من خير الاصناف
رفقة وفاء ماهيب رفقة خراتيت = يدري بها القاصي مع الناس تنشاف
واللي مقـفي عنه بالمـثل قـفيـت = جعله يولي في ثمانين ذولاف
اللي جحـدني بالرخـا عنه لديـت = لوهو قريبي مالحق قلبي حساف
مبغـا صلاتــه ياهلي لاتوفـــيت = تكفي صلاة اللي ملابسهم نظاف
بعض الاوادم تقتله علبة فليت = رشيت فوقه ريد رشيت بف باف
وغسلت يمناي الكريمه وصديت = صديت صدت واحدٍ شاف معاف
شاف الاوادم حيها كنه الميت = الروح حيه مير ماتن الاطراف
وعيونها ماتميز الجمر والليت = حد النظر لابعد من البطن وخلاف
كن القلوب اللي بها صاير الزيت = ضخ القلوب تقول سوبر اوقولاف
يانفس شومي والمواقف تبي صيت = عدي على المرقاب من فوق مشراف
ولاينفع الرجال ياليت ياليت = كم اشهبن مفلس من الصيد لوحاف
ولاتامن النكبات مهما تهقويت = ياعارف العريف به ناس عراف
اخذت من دنياي مكسب وخليت = ماقول اخذت الكسب كله يالاشراف
هذا كلام مثبت العلم تثبيت = جاب الصحيح ولاقبلها تخطاف
من لابتن تموت منها الطواغيت = بالطيب تاصل ياعرب حد الاسراف
ربعي هل الوقفات مهما تماريت = ترمي هدفها فعل وتصيب الاهداف
وختامها صلوا معي يوم صليت = على النبي صلوا كثر ساعيٍ طاف