هذه القصيدة أرسلها لي الشاعر معوض السهلي يقول فيها :
وقت مضى ياليت لو يوم ينعاد= ودي تعود أيام من وقت ماضي
وقت ٍ مضى مافيه غيبه ولا أحقاد= واليوم عم الحقد كل الأراضي
وقت ٍ مضى مافيه للظلم ميعاد = واليوم صار الوقت يحتاج قاضي
وقتٍ مضى مافيه ياضيف حساد = واليوم وين الطيب وين التراضي
مدري تغير وقتنا حرب وجهاد = ولا تغير طبعنا الافتراضي
وكتبت له هذا الرد :
العمر يمضي والزمن صار جلاد = ولحدن على حاله من الناس راضي
هذا يشوف انه مع الوقت منقاد = وهذا يعيش الوقت ذا بنتفاضي
لا لا تحاول تقضي العمر بعناد = ولا تتبع اللي خالي العقل فاضي
ساير زمانك والصعب غصب ينقاد =والرابح اللي ينوصف بالتغاضي
نمشي بديانا على درب الأجداد = والحكم لله ماعليه اعتراضي
= أبووليد ،،،