بسم الله الرحمن الرحيم
يستوي نظم القصيد ووزنه وقيفانه=والبيوت الي يشوق المستمع مبداها
والمقام يخلي الهاجس يطول عنانه=لين يوصل غاية الخاطر اليا ملفاها
ياسلام الله سلامٍ ثابت ميزانه=في محل العزوة الي عزها يبراها
روس قومٍ تكرم الطيب وترفع شانه=للوفا لاطاب طيبها تحث خطاها
الوفا بعيال راشد بينن برهانه=من وفاها كل علمٍ طيبن يشعاها
يامحمد ظنك بربعك هذا عنوانه=وأنت تستاهل وفاها لاكسبت رضاها
يوم حققت الطموح وخضت في ميدانه=تستحق الوقفة الي ساميٍ معناها
أنت ذخر الي سيرهم بالفخر مليانة=وأنت ذخر الي مواقفها تعز أسماها
إن ذكرنا الحاضر الي شامخن بنيانه=وإن ذكرنا الماضي الي سيرته ذكراها
يوم نجد من الحرايب سامكن دخانه=وكل قومن دون ناقتها ودون حماها
وأهل الفاحج ليا حد القشر نيبانه=من مهابتها عداها ماتقر أرياها
صفها لاضد له صفٍ تطيح أركانه=بالجموع الي عزاويها تحشر عداها
قبل ينساق الامان وتنفتح بيبانه=والفتن جاها الزعيم الفيصلي وأفناها
الشاعر / عبدالكريم البدراني