لك يا وليد اكتب حروفي أناشيد
عسى الرجا بالله ثم الرجا بك
قيم الصلاة ووحد الله توحيد
واحرص على السنة واحفظ كتابك
ذروة سنام المجد ترقاه وتزيد
ماهو بلبس عقال وكشخة ثيابك
واحرص على عاداتنا والتقاليد
لا تغرك الدنيا وتفقد صوابك
الناس تنقد لا تجي للمناقيد
خلّك على نجم الثريا ركابك
الحر يصدق ويلتزم بالمواعيد
لا دقّت ا يدين الرجاجيل بابك
يامرحبا واهلين قلها تراديد
للضيف جاوب عنوته مرحبا بك
ترى الكرم والطيب فعل الأجاويد
لا ترد من هو بالعسر انتخابك
ولا تشرب إلا من زلال المواريد
صافي قراح الماء تعوّد شرابك
ولا تقطف إلا عاليات العناقيد
لا تلتفت للي هوت في ترابك
وطرد المقفي يتعب الروح مايفيد
خلــّك مع الواضح واترك سرابك
وابعد عن اللي شايل بصدره الكيد
اللي يحس بفرحته في عذابك
درب الشرف والعز لا تعكس السيد
وليد ... لا تقطع رجا من هقابك
وصبرك على جرحك ترى خير تضميد
لا تشتكي للناس من شي صابك
حربي تراك ومن رجال ( ن ) صناديد
يحق لك تفخر بهم بانتسابك
أهل السيوف اللامعة والبواريد
وقت الشدايد حطهم في حسابك
ربعك بني بدران ون قيل تحديد
سهكر ومن راس الطويلة نصابك
وختام قولي اثني العلم واعيد
عسى الرجا بالله ثم الرجا بك
شعر / ضيف الله البدراني ( أبووليد )