[مشاري البدراني]

ياعابر الخاطر تصوّرت معناك = لاشك ماكل الخواطر تقالي
خذ صورتك لى جيت ساري بمسراك = مالك بها مصلوح تبقى ولا لي
تلقى من الشّعار الاقصين ذولاك = من ياخذ المعنى على كل حالي
وانا أتخيّر من معقّل مطاياك = مركوبة الفكرة وافكّ العقالي
إما سريت الليل من نجم الافلاك = وإلا مع شمسي تبعني ظلالي
أوزن كلامي قبل يكتب بالابواك = واقلّب المعنى على ما طرى لي
الورد طيبي واتسوّك من الراك = والثوب ضافي والقصر راس عالي
الناس تفنى والمباني والاملاك = والقول يبقى والخبر للتوالي
الشعر معنى حكمته بُعد الادراك = وما كل ما يلمع على النور غالي
والشّعر صورة شاعره فيه تلقاك = إما لبس لك جوخ وإّلا سمالي
يالله يالمعبود أنا لذت بحماك = من كلمةٍ تنقد عليها الرّجالي

خالد الفيصل