سمعتلي هرجةٍمدري وش اقصاهـا= حزة بصـدري وانامانـي بهارجهـا
لو كل كلمه ليا جتنا طـر د ناهـا=بعنا الثمينـه بسعـرٍ مـا يخارجهـا
لو مـرة السمـع ماكنـا سمعناهـا=ونقفـل الـراس عنهـا لايبرمجهـا
ومن يم هـذا لهـاذا مـا نقلناهـا=الناس واجـد وتلقـا مـن يروجهـا
ومن جابها بيـن خلـق الله وداهـا=لوبه مراجل تـرى نفسـه يسمجهـا
ومن عاملا الناس في سابق خطايها=يقعـد بـدارٍ خـلا مـاداج دايجهـا
في كنةٍ تشوي الجربوع رمضاهـا=تابس غصون الشجر من حر واهجها
والناس بلحق حكم الشيخ مرضاهـا=ماترضي الناس لو انـك اتحججهـا
يلي تبى الطيبـه خذهـا وعطناهـا=خـل الطريفـه طريـة لا تثلجـهـا
واقظب طريق الاوادم وامش ممشاها=اتبع ادروب العرب وانهج مناهجهـا
وارسم النفسـك حـدودٍ لاتعداهـا=من حط نفسه بدرب الضيق يحرجهـا
وانكان نفسك هواهـا قـام ينحاهـا=حط الاعنه بروس الخيل واسرجهـا
فكـر ابمنكافهـا قـدام مغـزاهـا=واضرب حساباتها واتشوف ناتجهـا
كلن بعضده يموح الدلـو برشاهـا=وتلقا اكبود الضوامي مـن يبرهجهـا
وانكان توك على صدرك تهجاهـا=حنا ترانـا انـدرس فـي مناهجهـا
من يم مسراحهـا نبعـد امعشاهـا=الياقعـد راعـي الضالـع يدرحهـا
لو هي صعيبه اليا انعاجة عدلناهـا=والي تجـي مستقيمـه ماانعروجهـا
نهتم فـي وزنهـا وابـرام معناهـا=ومـن الكرستـال واللولـو انتوجهـا
مثل الجواهـر اليامنـا نضمناهـا=واسلوكها من جديد الـزري ننسجهـا
مخايلن ترتـدم والصـدر منشاهـا=لادك بلـبـال داكـوكـن يهيجـهـا
واليامطرة ضاقت الوديان من ماهـا=تاخذاليا الحول ما يبسـت مدارجهـا
ان صدت الناس عنا ماعترضناهـا=ماتقفـي النـاس عنـا وان تولجهـا
وانجاتنا الطيبـه بالطيـب زدناهـا=الطيبـه بالعسـل والسمـن نمزجهـا
وان جاتنا الثانيه نصبـر ونرفاهـا=يمكن اليـا فـاق راعيهـا يعالجهـا
وان عادها عـودةٍ ماعـاد ينساهـا=من حربةٍ في صميم الصدر نولجهـا
مسمومةٍ يبلـش الدكتـور بدواهـا=مايقنـع الخبـل لينـنـه يلامجـهـا