[مشاري البدراني]

هايف الميلاف بالنّايـف وحنّـي= من خلاجه لاج ماله بالمكانـي
له موارد لو مضاميـه أبعدنّـي= كم فجوجٍ باجها زمل الصخانـي
تنعرف بيض اللّهود أليا سرنّـي= يخلفنّ الوصف الأول وصف ثاني
كم جبا عـدّ وردنّـه وصدرنّـي= مضمياتن مثل الأقواس الحوانـي
شيب أشابيبٍ مماشيهـن تعنّـي= مايجوب دروبهن حشو القرانـي
حركن عرش الخفوق وهيضنّـي= زين الأمثال الجزال من المعانـي
من نسانيس الهواجيس أحضرنّي= فنّ أحاسيسٍ من السحر العماني
عن نواظر مدّعْ العرف أحجبنّـي= العدو قبل الصديق اللّـي يرانـي
آدمي روحٍ بجسم وفكـر جنّـي= بالبحار أسرار خلـقٍ ماخفانـي
كم تدور صدور أمـور ماخفنّـي =الطعم بالمستكـا غيـر اللبانـي
أجهل اللّي مايعرف أسرار فنّـي= المثايل للحكيـم أقـرب مكانـي
ياحمد(1) لو تنشد الأيـام عنّـي= ماتصدق لو حكن لك عن زماني
دور حول أعطي الليالي ماعطنّي= بسّ أسرحهن وأضويهن بدانـي
كل مازادن من الربـح أفرحنّـي= لا أختفا بجلودهن حبل البطانـي
ياحمد ياكثـر ماراحـن وجنّـي= والحصيل أكليل من شوك سعداني
والهواجيس العوابـس داهمنّـي =وصنعن لي حمل ياسٍ كبر أباني
وأن شربت من العزيمه زاد جنّي= والحكيم اللّي يحكمـه ماقرانـي
الله اللّي زادني بالنقـص منّـي= في طريقٍ ضلّني مدري هدانـي

للشاعر/// فلاح بن مبرد الحميداني