قصيدة الشاعر لافي حمود الغيداني مهداه لعليان الطهيمي
ياراكـب اللـي لياناظـرت تمثـالـه
تقول صقر ٍ موقـع لـه علـى قمـه
متنطـح ٍ للبـراد بــراس منـزالـه
تشتت الريـح شمـل الريـش وتلمـه
فاكسار .. في قيمته زود ٍ على امثالـه
لله دره لاشــال الـعـزم بمهـمـه
مايصير له وسق عرق الرمل محبالـه
عدو عـرق النفـود وهمـه وغمـه
صـدره ليامـن سـواقـه تسـاوالـه
يشرب قراطيع صلـف الريـح وتزمـه
راعيـه حـرك وهـو متريـح ٍ بالـه
متروح ٍ من بني عمـه لابـن عمـه
يسوقه الشوق من رجله الـى عقالـه
لشوف جمعـا رجـال ٍ مابهـم خمـه
من ديرة اهل النقا .. والطيب .. والطاله
والمذهب الزين .. والتوحيد .. والعمـه
شيبانها رمـز وقـت ٍ فـات وابطالـه
وشبابها للعـلا فـي روسهـم همـه
على طرفهـا خـزاز يميـل اضلالـه
قبل يحط الظـلام الشمـس فـي كمـه
لو مابهـا غيـر هاكالضلـع وجبالـه
نحبهـا كلنـا حـب الـولـد لامــه
( دخنه ) لعل السحاب يصـب همالـه
على ارضها لين يطلع كـل ماتضمـه
منها مشى الجيب لعـل السعـد فالـه
متيمـم ٍ يـمـة ٍ ماغيـرهـا يـمـه
منصاه رجل ٍ تهـرج النـاس بافعالـه
تبذل يمينـه .. وكثـر البـذل ماهمـه
من روس قوم ٍ تهوم الطيـب وتنالـه
ماينكـر امجادهـا رجـل معـه ذمـه
حرب الحرايـب كعـام اللـي يورالـه
بنفسه انـه مصمصـم راس ومطمـه
اهل المحازم .. بيوم ٍ تعـرف رجالـه
ومنصا الوازم .. وسقم العايل وسمـه
قلته .. وللمجد بـس لربعـي لحالـه
كـل ٍ حبالـه موردتـه علـى الجمـه
مابه قبيلـه ماهـي بالطيـب مختالـه
غصب ٍ على كل متبجـح .. ودرعمـه
وقصدي .. ومنصاي ابو فواز وعيالـه
وبيت ٍ بوسطه قبايـل حـرب ملتمـه
يضك بالناس مـن جالـه الـى جالـه
يطـري علـي لياشفتـه وادي الرمـه
تنطحك ريحة شذى هيلـه .. وفنجالـه
والعود الازرق منـه ينطحـك وتشمـه
نارد صناياه .. ونصـدر علـى دلالـه
ولاهوب جوع وعطش يوم انعنـا يمـه
كل ٍ غني .. ميـر يـوم انـا انتعنالـه
دافـع حميـاً تفـوح بكـل جمجـمـه
يستاهل المال رجـل ٍ هـذي اعمالـه
نفسه بمايزود نفسـه طيـب مهتمـه
يفداه مغلـول يمنـاً لـو كثـر مالـه
عن شنحة الطيب وجهه بـارد ٍ دمـه
اللي على قـول زيـد صحيبـه ريالـه
وان طاب طيبه من الزوجه الى العمـه
يالله عسى اللي شال اطيب منه يشتاله
يدلـي مخاليبـه زويـان .. ويخمـه
رجـل ٍ يدنـق عـن العليـا ولا يالـه
للطيب .. والدرب قدمـه فاتـح ٍ فمـه
ودك مـن بعيـد وقـريـب تحمـالـه
بمخمس ٍ مـن شحمـة الاذن للرمـه
وعن هالكلام .. وقصير الهرج واطواله
ياكثر بكم الزمـان .. وياكثـر صمـه
يقولـه اللـي تهمـه صحـة اقوالـه
ويسعى يوصل هـدف معنـاه ويتمـه
وصلو علـى المصطفـى نبينـا وآلـه
محمـد اللـي بعـث برسالـة الامـه