إهداء خاص للعزوبية ...

[عبدالله بن سدحان البدراني]

السلام عليكم ورحمة الله وبركاته
بما اني عزوبي . . اعجبتني ابيات لااعرف من قائلها
لكن اترككم مع الابيات :

قال العزوبي

قال العزوبي يوم شاف المعاريس=الرابح اللي لاقعد مايقومي
أول سنة كل ٍ يبث الاحاسيس=وثاني سنة تجلب عليك الهمومي
وثالث سنة حط الرمل والمتاريس=لابد من حربٍ تقوم وتدومي
لامن دخلت الدار لكنها بليس=متلفلفٍ في غاليات الهدومي
تأخذ من المخباة وتسحب من الكيس=وتغير الموديل شي ٍ لزومي
وان قلت ما أملك يامره لوهو فليس=قالت تديّن لا تكثر بلومي
ولاجيت مرة ناويٍ لك ب.......=قالت تصّبر خل قلبك رحومي
ليتك تساعدني تصحح كراريس=زادوا علينا أربع حصص في العلومي
أزواره في العصر والصبح تدريس=والليل تصحيحٍ وودي أنومي
تبكي إذا جاها وجع لوهو ضريس=وتقول أبي دكتور ماهو حكومي
يروح عمرك بين عرس ٍ وتأسيس=واربع سنين والبزارين كومي
وسط المطابخ بين قز ومحاميس=هذا صحن رز ٍ وهذاك ثومي
والا خلصت إمنظفٍ الملاليس=جتك تقول انهج نبي زود لومي
ولا جبت قالت اكنس الحوش تكنيس=خل البلاط يصير مثل النجومي
ومكرسٍ جهدك من الخوف تكريس=وان نادتك بالصوت اقبلت مومي
يجيك تال الليل دايم كوابيس=ويشيبنك مزعجات الحلومي
هذي حياة اللي ركض باغي......=ضيع حياة أول وصار محرومي
تعيش يالمعرس حياة المحابيس=وشف العزوبي بكل شارع يحومي
من مفرق جلاجل إلى جوي للخيس=وان حار حايرهم بوسطه يعومي
يفرح إذا شاف الوتر والمراويس=وفي كل يومٍ كاشتٍ ومعزومي
شف العزوبي مايعرف الهواجيس=ولا يودي حرمته كل يومي
يا عنك ماحاش الفخر والنواميس=الا عزوبي ٍ يعرف السلومي
اذا اعرس المعرس غدا عندنا هيس=ونزيل اسمه من سجل القرومي
والى بغيت البهذلة والدحاويس=فأعرس وخلك من عداد الرخومي
وش صابكم من عرسكم يا المفاليس=وش استفدتوا غير دق الخشومي
اللي تزوج أشهد انه غدا تعيس=والرابح اللي ماخذٍ له ..........
ترى عناق العام نطت على التيس=والحرعقب العرس يصير بومي

قال العريس

قال العريس أنا الذي في سعاده=ماني عزوبي ضايق الصدر مهموم
مبسوط من مثلي قعد عند غاده=مهوب مثل اللي لحاله تقل بوم
في كل ليله حاضنٍ له وساده=وانا مع المزيون في غرفة النوم
أنا اشهد انه عايشٍ في قراده=يروح عمره ما تهنى ولايوم
الى دخل للبيت يبلش بزاده=يقعد يقطّع له طماطٍ معه ثوم
ولا قضى عقب العصر من عداده=والحوض من كثر المواعين مزحوم
والى غسلهن ثم فك السداده=دلى يغسل له سراويل وهدوم
وان ماطبخ روّح لمطعم حماده=والا قعد في منزله واعلن الصوم
وان جاه ضيفٍ باغيٍ له رفاده=يروح يشري رز وايدام ولحوم
ما يعرف الشمبو وراسه عراده=وشمغه من الكواي مليانه رقوم
ما يكنس الفرشه ويلقط بداده=اما بقايا رز او خبز معروم
عنده صراصيرٍ بحاجه اباده=تسرح وتمرح في الغرف دايم الدوم
يجمع قروشه ويتسلف زياده=حتى يسافر مصر او ديرة الروم
او راح يم التاي وترك بلاده=ناظر جوازه ممتلي كله ختوم
دايم يسافر ما يعرف العباده=يسكر وينكر و........ بالكوم
وإلى رجع يروح يم العياده=حيث ان فيده من فعايله مزكوم
وإلى قعد مارس مع .......عاده=حيثه مسيكينٍ من العرس محروم
له موتر خرده كثير فساده=في كل يومٍ في الاشارات مصدوم
غمارته تقول ورشة حداده=ومريقده في شنطته دوم محزوم
دوم يتنقل تقل كنه جراده=في كل يومٍ نازل له على قوم
يسهر والى قام الظهر من رقاده=روّح على شغله والى اليوم مخصوم
يذي بنات الناس يبغي مراده=في كل يومٍ زاهمٍ له على ( هوم )
اراه مايعرس ويقدح زناده=يترك بنات الناس ويصير معصوم
يلقى هنوفٍ تخدمه مثل داده=ويصير رجّالٍ ويسلم من اللوم
يفرح الى من قرب وقت الولاده=ويصير معنى العرس بالحيل مفهوم
يشوف أولاده ومعهم شهاده=قبل الوفاة وقولة الناس مرحوم

تقبلوا تحياتي . .