خلف والابل

[البرنس]

قالوا ارقد قلت انا وين انا وين الـرقاد = الرقاد لخفـــرة ظامر سرجـوفهـا
وشبهها من رايب العين مطفي الزنــاد = دقسة ما ميّز الناس وش معروفـــهـا
طافي كنك تكثح على وجهه رمـــاد = من رداه يخاشر البنت في مصروفـــها
كيف ابرقد واحتجب عن نسانيس البراد = نفحة الغربي يسر الحشا هفهوفـــها
والفحل يرعى المعاشير طلق بـلا قيـاد = فارس يحمى طرفها ويمن خوفــــها
ساعة في جو خالي من أيام العــــياد = والفياض يعط ريح النفل بحروفـــها
والدلال مساطـرة خاثر فيها القنــاد = والقصص والسامرية تشيل صفوفــها
احمـد الله زال همي وحققت المــراد = طبت والفرصة تطوف الردي ويطوفـها
من طبيعة كل طيــب يجهز للجهـاد = والرجال الأقوياء تلتفت لضعوفـــها
يحسبون الأرض خصبة قبل زرع وحصاد = السنين تسـل فوق الرقاب سيـوفــها
ماصفت للأنبياء و الملوك وقوم عــاد = كم قصور شــيدت وارجمت بـسقوفها
ناقتي ماتدخل السوق لو زاد المــزاد = لو هل الربطات جــتني تشيل اولـوفها
لو يصبون الذهب صب وامهار تقـاد = مرخص البل واختيــار النفوس شفوفها
والاناسة والهوى والمحبة =طاعة الله والمراجل قضــبت شــعوفها
ونستي ملحا من البوش غاربها سنـاد= فاهق سنامها ناشــب بردوفــــها
بالخضيرا راسها كنـها تطرد جــراد = يخزي الشيــطان يوم العيون تشوفـها
والاذاني بالسناقر كما الشـلف الحداد = افطس عــرنونها ضافين غـضروفهــا
ذيلها ابتر خوش عذروب والعرقوب عاد= منشــزة نداف قطن يديه تحوفهــــا
والعضـود مشمرة عن مـذكاها بعاد= يوم احــلي باب عجلان بين اكتوفهــا
كتفها عن وركها عشـرة أشبار وكاد= والخفاف مـن الفحل والوصوف وصوفها
هضبة متحمطرة دامس فيها الســواد = قطعة من ليل تــدفن يدك بدفوفـــها
ديرة متنقلة من بــلاد اليا بـــلاد= القرا في درها والـذرا من صوفهــــا
زاد من غابــوا مديده ولا فالبيت زاد= عاطفة مـن عطفها ما تخيب ضيوفهـــا
هي معاش أجدادنا والعصـب والاقتصاد= أهلنا قد حـسنت بالحياة ظروفهــــا
ينطحك ريحة عبسها مثل ريــح الزباد= كن مسك القيصرية بعث مـن جوفهــا
تقهــر الاعدا نهار المزايد والعنــاد= كظمت مــن غبنها وصفقت بكفوفهــا