مرحوم ياصياف ياسيـد القـاف = مرحوم يافخري وفخر الحروبـي
مرحوم ياللي بالمواقيف ماخـاف = مثل الجبل ماحركتـه الهبوبـي
مرحوم ياللي زاهيه فيه الاوصاف = عن المراجل حالفـن مايتوبـي
قضى حياته عز مايرجع خـلاف = صادق والا قضا حياتـه كذوبـي
انا بكيتك يوم عايـش وتنشـاف = واليوم انا بللت بالدمـع ثوبـي
الشعر من بعدك كرهته وينعـاف = ماعاد من بعدك نبيلـه دروبـي
روح معك من يوم شالتك الاكتاف = وغابت معك شمسه قبيل الغروبي
يارب ياللـي بالمخاليـق رواف = ترحم عزيزن مسكنـه بالقلوبـي
اعداد من صلى فبيتك ومن طاف = واعداد ماحزنت عليه الحروبـي
أحمد السحيمي=