حبيب العريمة يمدح مطير...

[ضعيان بن طفيح]

الأخوة الكرام قصيدة للشاعر: حبيب العريمة الحربي

يمدح مطير ورجالها وهذا ليس بغريب على الأوفياء أمثاله

والقصيدة تقول :

يقول من يشكر المعروف بالقافي = قافن بناه العريمة من هناديبه
يا ذيب ما يدفن المعروف بالسافي =يا كود عفن(ن) رديات مجاذيبه
قالوا لنا عِشرة المطران تنعافي = واللي عرفنا من المطران ياطيبه
والله ما اصدق بعرفي كل عَرافي= وانا من اللي عرفهم من تجاريبه
زرنا الشمال ولقينا مكرم اللافي=الصاحب اللي عسى الايام تبطي به
لي بين واصل وعلوى صاحب صافي= ومعارف ما بهم شك(ن) ولاريبة
علوى هل الصيت الابيض والمثل كافي = وواصل من اطيب قبايل نجد ندريبه
منهم عشيري سعود الاول الوافي= وسعد وابوهم على وضح النقا شيبه
وعبدالله العيد له بالجود ميقافي =عشيري اللي هو الثاني بترتيبه
ربع(ن) وفاهم لنا ملموس ويشافي= ومن عز نفسه وربعه عز اصاحيبه
وحمد عقيل فداه القادر الخافي = ليا قال قول(ن) عريب الساس يافي به
وعاشرت منهم رجال ما بهم جافي= ما فيهم اللي تردى عن مواجيبه
الكل منهم بعيد شبوح وسنافي= لو قالوا الناس ما آخذ به ولا اعطي به
لمطير عندي شهادة حق وانصافي= قول على فعل والعالم تغني به
كون العوارض فريد(ن) ما له اوصافي =مع شيخ شمر ولا طاعوا مناديبه
يوم الرقيبة رقى في راس مشرافي= قال اعتزوا يالعوارض شفتلي ريبة
وفازوا بيوم فيه الارياق نشافي = من طلعت الشمس لين انحت لتغريبه
وسبع العبيات منهم شاف ما عافي= علي الخليفة وطشوا من مراكيبه
بمسلبات لهن في القاع رجافي= من كل شبل(ن) عطيبات(ن) مضاريبه
وابن معلث شريف السالفة لافي= اللي جلا مع ضيوفه عن معازيبه
عقيد جيش(ن) يحوفن حمّ الاشعافي= كم شيخ قوم(ن) كِفى مليا مشاريبه
يامطيريا طيبكم مااطيع الاجحافي=وهرج العرب ضدكم مااسمع به ولااوحي به
والناس فيهم هلل وارباع وأنصافي=وفيهم شبه كامل تقصتن مطاليبه
ياساتر العيب يالله سترك الظافي= الله من اللي يعيب الناس في عيبه
لوفتشوا به لقوا به حدر الاظلافي =عيب(ن) يجيبه جديد وعيب مبطي به
تمت ورد الثناء من طبع الاشرافي= واللي يذم ويعم الناس والخيبة

الشاعر / حبيب بن عواد العريمة المزيني الحربي